ඊයේ රාත්‍රියේ අම්මාට මම කතා කරනා විට ඇය මට කීවේ , අනේ පුතේ සමණළයෙක් ආවා , ලොකු අම්ම ගාවම හිටියා , පෙට්ටිය වහනකල්ම හිටියා , ගියේම නෑ , ලොකු අම්මා හොඳ තැනකට යන්න ඇති , එයා කවදාවත්ම පවක් කරේ නෑනේ කියාය. මේ වචන කීපය මට ගෙනාවේද සතුටකි. ඉන පසුව මම අන්තර්ජාලය පීරා ඒ ගැන සෙවුවෙමි. මට නොතේරෙන සමහර තැන් ( මට මහා බර ඉංග්‍රීසි දැනුමක් නැත ) මම රොශාන් මල්ලිගෙන් අසා දැනගත්තෙමි.
එය සැබෑවකි.
අන්තර්ජාලයේ ඒ සම්භන්ධව ඇති බොහෝ ලිපි වලට අනුව කෙනෙක් මිය ගිය පසුව ඒ මිය ගිය තැනත්තාගේ දේහය අසලට සමණළයෙකුගේ පැමිණීම යනු , ඒ මියගිය තැනැත්තා වඩා හොඳ ආත්මයකට ගිය බව දන්වන්නට එවනා පණිවිඩයකි , සංකේතයකි. ( එය මිත්‍යාවක් වුවත් මට කම් නැත , මම එය විස්වාස කරමි )
ඉතින් මට සතුටුය. ලොකු අම්මා ඇය පෙර ආත්ම බවයක සිට ගෙන ආ සියළු පවු මේ ආත්ම බවයේ ගෙවා අවසන් කොට වඩා හොඳ ආත්ම බවයකට ගියාය. ඇගේ කුසෙන් බිහි නොවූවද ඇගේ දරුවන් ලෙස එය අපට සතුටකි.
මගේ ජිවිතේ මා දුටු අහිංසකම ගැහැණිය ඇය ය. තමන්ගේ ප්‍රේමය වෙනුවෙන් මියෙන මොහොත දක්වාම මග බලා සිටි එකම ගැහැණිය ඇයය. ලොකු අම්මා මියෙන තුරුම කිසිම දවසක අල්මාරියේ සියළුම රෙදි දැම්මේ නැත. ඇය නිතරම ගමන් මල්ලකට රෙදි අසුරාගෙන පාර බලා සිටියාය. මගේ අසල්වැසි සමීපතමයන් මේ ගිණුමේ සිටිනා බැවින් මේ කියන්නේ බොරු නොවනා වගට ඔවුන් සාක්කි දරණු ඇත. පාර අද්දර වාහනයක් නැවතූ සැනින් ආ සනී මහත්තයා මාව එක්ක යන්න ඇවිල්ල වෙන්නැති , බලන්න ඩෝටර් රතු කාර් එකක් ද කියලා යි ඈ කියන්නීය. ඈ එතරම්ම බලාපොරොත්තු සහගතව සිටියාය. අවසන ඈ බලාපොරොත්තු හුළඟට අතැර නික්ම ගියාය.
සිය නැගනියගේ සැමියාට ජූලි වැඩ වර්ජනයෙන් අවු. 7 ක් පුරා රැකියාව අහිමිව සිටියදී ඒ නැගනියගේ දරුවන් තිදෙනාව ඈ රැක්කාය. ඈ මියෙන මොහොත දක්වාම ඒ කරන ලද උදවු අපි සියල්ලෝම මතකේ තබාගෙන සිටියෙමු. නිතර මන්තරයක් මෙන් අපේ තාත්තා ඒ උදවු ගැන මතක් කරමින් ලොකුඅම්මා වෙනුවෙන් කල යුතු යුතුකම් සියල්ල කලේය. දරුවන් ලෙස අපට කළ හැකි සියළු දේද අපි කළෙමු. ඒ සියල්ල අවසානයේ ඈ නික්ම ගිය පසු අපට ඇත්තේ ඇය නැති හිස්කමක් පමණි. ඇත්තටම දුකක් නැත. ඒ දුකක් නැත්තේ අප , අපට කළ හැකිව තිබූ සියල්ලම කළ දරුවන් නිසාවෙනි.
💜 ඇය අසනීප වූ දෙවාරයකදී මා තැබූ සටහන් කියවා , ඇයට නීරෝගී සුව පැතූ ඔබ සියළු දෙනාටමත් , ඇය නික්ම ගිය පසුව ඇය වෙනුවෙන් අකුරක් ලියූ සියළු දෙනාටමත් මම ස්තූතියි යැයි කියමි.
ලොකු අම්මා දැන් සතුටිනි. ඉතින් දැන් මම ත් සතුටිනි !
ඔබ වපුරන දෑ දිනක ඔබ නෙලාගනු ඇත. ලොකු අම්මා කිසිම දවසක පවක් කියා කිසිවක් නොකලාය. ඉතින් ඈ යහපතම නෙලා ගත්තාය. 💜
No comments:
Post a Comment