අම්මයි පුතයි !
අම්මෙක් වීම පහසු නැත.. දස මසක් කුස හොවාගෙන පමණක් නොව ඉන් මතු මැරෙන තුරාවටම හිතෙහි හොවාගෙන ජීවත් වීම පහසු නැත. අසීමිත වූ වේදනාවක් අවසන කිරි කැටි මූණක සේයාවක් එකී වේදනාව අවසන් කරන්නේ එහෙවු වේදනාවක් වින්දාදැයි පවා අමතක කරවමිනි. එය පුදුමාකාරය. ඒ වේදනාවේ ප්‍රතිපලය පුතෙකු නම් අම්මෙක්ට ඊට වඩා දෙයක් නැත.. ඊ ගාවට ඉතින් පතන්නේ දුවක් ය.
පුතෙක් යනු අම්මෙක්ගේ සිහිනයක් බව මම කියමි.
පුතෙකු හා ඉහගහන්නට අම්මෙකුට ලේසි නැත. අම්මා සිටිය යුත්තේ පුතාට ඕනෑ ලෙසය. පුතා සිතා ඉන්නෙ මෙලොව රසම කෑම හදන්නට දන්නේ අම්මා කියාය.. එපමණක් නොව කියනා සැනින් එසැනින් ඕනෑම කෑමක් හදා දෙන්නට අම්මා සමත් කියාය. ඒ කෑම රෙසිපි අම්මා ඉන්ටර්නෙට් පිහිටෙන් හදා දෙන බවක් පුතා දන්නේ නැත. පුතාට එය අදාලත් නැත. පුතෙකු හැම විටම කියන්නෙ මෙලොව ලස්සනම අම්මා තමන්ගේ අම්මා කියාය. ඉතින් අම්මා ලස්සනට ඉන්නට ඕනෑමය. අනිත් අම්මලාට දෙවනි වනවා දකින්නට පුතා කැමති නැත..
අප්පච්චී වෙත කෙලින් ඉදිරිපත් කල නොහැකි සියලු ඉල්ලීම් අම්මා හරහා ඉදිරිපත් කිරීම පුතෙකුගේ සිරිත වන අතර එය අනිවාර්යයෙන් අම්මා විසින් ඉටු කරනා බවත් පුතුන් දනී. අම්මා අප්පච්චී අතර වන අලකලංචි පුතාට අදාල නැත. වැඩේ කෙරනවානම් ඔහුට එච්චරය.
තමන්ගේ සියලු වැඩ අම්මා ලවා කරවාගැනීම පුතෙකුගේ සාමාන්‍ය සිරිත වන අතර, තමන්ටම ලැජ්ජා සිතෙන මොහොත දක්වාම පස්ස පැත්ත හෝදන එකත් අම්මාම කරන තුරු පුතුන් බලා හිදී. පාසැලේ සියලුම කේලම් අම්මා ඇසිය යුතු අතර, පුතා හා අංචි දාගන්නා සියල්ල එක්ක අම්මා අංචි දා ගත යුතුයැයි පුතුන් තරයේ විස්වාස කරති. පාසැලේ සියලු ගෙදර වැඩ කරදීම අම්මා විසින් කල යුතු අතර නිකමට හෝ ඒවාට අප්පච්චී ගාවා නොගැනීමට පුතුන් වගබලා ගනී. ඔවුන්ට අප්පච්චී අවශ්‍ය කාගෙ හෝ ඕපදූපයක් කියවීමට, අම්මාව ඇවිස්සීමට, සෙල්ලම් කිරීමට, නිවෙස හැඩි කිරීමට, අම්මාගෙ බඩු මුට්ටු අත පත ගා ඒවා විනාස කිරීමට, ආදී වූ එකී මෙකී නොකී සියලු විනාසකාරී වැඩ උදෙසාම පමණක් වන අතර, ඒ සියලු විනාසයන් ඉවසීම අම්මා විසින් කලයුතු වේ..
පුතුන් වැඩියෙන්ම ආසා අම්මා ගාව නිදාගන්නට වන අතර, අම්මාගේ හුස්ම හිර වුවත් පුතුන්ට ඕනෑ අම්මාගේ පපුවට් ඔලුව තබාගෙන තුරුල්ව කකුලක්ද ඇඟට දමාගෙන නිදාගන්නට වන අතර නින්ද යන තුරුම ඔලුව අතගෑම අනිවාර්‍ය වේ.. එපමණක් නොව නින්ද යන තුරු අසනා ප්‍රශ්න කන්දරාවට උත්තර බදින්නටද අම්මාට සිදුවේ. පුතාට නින්ද ගියාට අම්මාට නින්දක් ලේසියට ලැබෙන්නේ නැත. පුතා පයින් ඇන විසික් කරනා රෙද්ද පෙරවීම , ඇද පුරා සක්මන් කරන පුතුව නිසි පරිදි තැබීම, පුතු ඇඳෙන් වැටේදැයි සැරින් සැරේ බැලීම, දවල් තිස්සේ නටා රිදෙනා කකුල් අතපය අතගෑම, පුතුගේ කොට්ටය සකස් කිරීම, ආදී දෑ අම්මා විසින් කල යුතුය.
පුතු අසනීප වීම යනු අම්මා රෝහල් ගත කිරීම හා සමාන වන අතර පුතු නීරෝගී සුවය ලබන විට අම්මා රෝගී වී සිටීම නිවසක සාමාන්‍ය ක්‍රියාවලිය වේ.. පුතෙකුට හචිමක් ගියා දැක්ම අම්මාට අනුව නියුමෝනියාවේ මූලාරම්භය වන අතර අම්මාගේ වදවීම සතපහකට ගණන් නොගැනීමට පුතෙකු සෑම විටම වගබලා ගනී.
ඒ කෙසේ වෙතත් අම්මෙකුගේ කඳුළක් දැකීම පුතෙක් නයගරා ඇල්ල දැක්කා ලෙස ගනන් ගන්නා අතර ඒ කඳුළට හේතු භූත වූ කාරණාව සමග උරණ වීමට පුතෙකුට යන්නේ තප්පරෙනුත් සීයෙන් පංගුවක් ය. පුතෙකු සෑම විටම අම්මෙකුගේ සෙනෙහස අසීමිතව බලාපොරොත්තු වන අතර ඔහුගේ ලොවේ රැජින අම්මා වේ.. අම්මාටද පුතෙකුට වඩා ලොකු රජෙක් තවත් මේ ලොව නැත...
ප්‍රභානී තෙන්නකෝන්.
No comments:
Post a Comment